रिपब्लिकन पार्टी ऑफ इंडिया आक्रमक
श्रीरामपूर (दिपक कदम) रयतेचे राजे कुळवाडी भूषण छत्रपती शिवाजी महाराज यांच्या बद्दल केलेल्या वक्तव्याच्या निषेधार्थ येथील रिपब्लिकन पार्टी ऑफ इंडियाचे जिल्हा कार्याध्यक्ष सुभाष त्रिभुवन यांच्या नेतृत्वाखाली मराठी अभिनेता राहुल सोलापूरकरांच्या प्रतीकात्मक पुतळ्याला चपलांची माळ घालून रिपाईच्या वतीने जोडे मारो आंदोलन करण्यात आले.
शहरातील रेल्वे स्टेशन समोर डॉ.बाबासाहेब आंबेडकरांच्या स्मारकासमोर रिपाईचे कार्यकर्ते एकत्र होऊन अभिनेता राहुल सोलापूरकर याच्या विरोधात जोरदार घोषणाबाजी करून त्यांच्यावर देशद्रोहाचा गुन्हा दाखल करावा या मागणीचे निवेदन श्रीरामपूर शहर पोलीस ठाण्याचे पोलीस उपनिरीक्षक गणेश जाधव यांना दिले यावेळी रिपाईचे जिल्हा कार्याध्यक्ष सुभाष त्रिभुवन मातंग आघाडीचे जिल्हाध्यक्ष मोहन आव्हाड जिल्हा उपाध्यक्ष योगेश बनसोडे युवक शहराध्यक्ष विशाल सुरडकर अमित काळे आदी उपस्थित होते.निवेदन प्रसंगी सुभाष त्रिभुवन म्हणाले की युट्युबच्या पॉडकास्ट कार्यक्रमात छत्रपती शिवाजी महाराज यांच्या बद्दल केलेल्या वक्तव्याचा तीव्र शब्दात आम्ही निषेध व्यक्त करत असून अभिनेते राहूल सोलापूरकर यांच्यावर त्वरीत देशद्रोहाचा गुन्हा दाखल करून त्यांनी छत्रपती शिवाजी महाराज यांच्या पुतळ्याच्या पायावर नाक घासून सबंध शिवप्रेमींची जाहीर माफी मागावी तसेच भांडारकर प्राच्यविद्या संशोधन मंदिर विश्वस्त पदावरून त्यांना हटवण्यात यावे.
अन्यथा राहुल सोलापूरकर दिसेल तिथे त्यांच्या तोंडाला काळे फासण्यात येईल असा इशाराही यावेळी सुभाष त्रिभुवन यांनी दिला.प्रसंगी सुनिल मोहन आव्हाड म्हणाले की महापुरुषांचा अवमान करणाऱ्या अपप्रवृत्तीला वेळीच भर चौकात ठेचले पाहिजे.यावेळी आंदोलनात रिपाइंचे सोनू राठोड प्रशांत अमोलीक अर्जुन शेजवळ आकाश पठारे अशोक शेळके राहुल भालेराव अमोल बोधक आदी उपस्थित होते.
