नाशिक दिनकर गायकवाड दिंडोरी तहसील कार्यालय, पोलीस ठाणे आणि परिसरातील शासकीय कार्यालयांकडे जाणाऱ्या मुख्य रस्त्यावर गेल्या तीन-चार महिन्यांपासून पावसाचे पाणी साचत आहे. निचऱ्याची व्यवस्था नसल्याने नागरिकांना साचलेल्या पाण्यातूनच वाट काढावी लागत आहे. महिला,ज्येष्ठ नागरिकांना विशेष अडचण येत असून संसर्ग आणि घसरण्याचा धोका आहे.
याबाबत रविराज सोनवणे आणि गोपाल जाधव यांनी तहसीलदार मुकेश कांबळे यांच्याशी चर्चा केली. “अधिकारी या रस्त्याने नियमित ये-जा करत असतील तर समस्या लक्षात का आली नाही?” असा सवाल उपस्थित केला.
स्टॅम्प व्हेंडरच्या जुन्या इमारतीतही पाणी गळती होत आहे.एक वर्षापूर्वी प्रांताधिकारी आप्पासाहेब शिंदे यांच्याकडे निंबाच्या झाडाच्या वाळवीच्या समस्येची तक्रार केली होती,पण देखभाल अद्याप झाली नाही.
तालुक्याच्या मुख्य प्रशासकीय केंद्रात मूलभूत सुविधा नसल्याबद्दल प्रश्न उपस्थित होत आहेत. पर्यावरण क्षेत्रात काम करणाऱ्या मेत्ता फौंडेशनच्या वतीने परिसरात कायमस्वरूपी निचरा व्यवस्था,रस्त्याची दुरुस्ती,इमारत दुरुस्ती आणि झाडांची देखभाल तातडीने करावी,अशी मागणी प्रशासनाकडे करण्यात आली आहे.
