अल्सरग्रस्त रुग्णाला मदतीचा हात; चित्रकार उदावंत व भागवत यांनी जपले दायित्व
श्रीरामपूर (प्रतिनिधी) वैद्यकीय खर्चाचा विषय येतो, तेव्हा परके सोडा आपले देखील पाठ फिरवतात, हे समाजाचे वास्तव छेदणारे कार्य चित्रकार भरतकुमार उदावंत व रवी भागवत यांनी करून दाखवले आहे.कला क्षेत्रातील या गुरू-शिष्याच्या जोडीने शहरातील अल्सरग्रस्त रुग्णाच्या मदतीसाठी श्रीरामपूर पत्रकार संघाच्या वतीने रंगरेषा मदतीच्या हा उपक्रम राबविला. या उपक्रमातून रुग्णाला तब्बल एक लाख रुपयांची मदत उभी राहिली आहे.
श्रीरामपूर पत्रकार संघ व सामाजिक कार्यकर्त्यांनी या उपक्रमाचे सोशल मीडियासह विविध माध्यमांवर कॅम्पेनींग केली.रविवारी श्रीरामपूर नगरपरीषदेचे मुख्याधिकारी मच्छिंद्र घोलप यांचे अर्कचित्र काढून या उपक्रमाला आरंभ करण्यात आला. दिवसभरात उदावंत व भागवत यांनी १०० हून अधिक कलारसिकांचे अर्कचित्र रेखाटले.
सायंकाळी ६ वाजता जिल्हा पोलीस प्रमुख राकेश ओला यांनीही या उपक्रमाला भेट देत भागवत यांच्या कुंचल्याच्या फटकाऱ्यातून स्वत:चे अर्कचित्र रेखाटले. उपक्रमाचा समारोप करताना ओला म्हणाले, श्रीरामपूरची पत्रकारीता संवेदनशील आहे. पत्रकार व चित्रकार भागवत, त्यांचे गुरू उदावंत यांच्या दायित्वाला सलाम.
कला रसिकांनी अर्कचित्र साकारल्यावर दिलेली मदत १ लाख रुपये जमली.पोलीस निरीक्षक नितीन देशमुख यांच्या हस्ते ही रक्कम पत्रकार संघाचे अध्यक्ष अशोक गाडेकर व पत्रकार संघाचे सदस्य यांच्याकडे सुपूर्त करण्यात आली.गाडेकर यांनी हा मदत निधी वांढेकर यांच्या बॅँक खात्यात उपचारासाठी वर्ग केला.या उपक्रमासाठी श्रीरामपूर पत्रकार संघाचे सर्व पदाधिकारी व सदस्य, सामाजिक कार्यकर्ते यांनी सहकार्य केले.
सलग नऊ तास अर्कचित्र रेखाटण्याचे रेकॉर्ड
सकाळी १० वाजता अर्कचित्र रेखाटण्यास सुरुवात झाली. सायंकाळी ७ वाजता या दोन्ही चित्रकारांनी शेवटचे अर्कचित्र रेखाटले. नाश्त्यासाठी घेतलेला पाच मिनिटांचा ब्रेक वगळता उदावंत व भागवत यांनी नऊ तास सलग अर्कचित्र काढण्याचे अनोखे रेकॉर्ड नोंदविले. त्यांच्या या कलादायित्वाचे श्रीरामपूरकरांनी कौतूक केले आहे.
फोटो ओळी
श्रीरामपूर : रंगरेषा मदतीच्या या उपक्रमात चित्रकार रवी भागवत व भरतकुमार उदावंत कलारसिकांचे चित्र रेखाटताना.
