ना गॉडफादर, ना राजकीय पाठिंबा — फक्त निखळ क्रीडाप्रेम!
श्रीरामपूर दीपक कदम भारतीय क्रीडा क्षेत्रात अनेक जण आपापल्या मार्गाने प्रगती करत असतात, पण कोपरगाव येथील पार्थ दोशी यांची कहाणी खास आहे. एक ग्रामीण मुलगा, ज्याच्याकडे ना मोठ्या ओळखी होत्या, ना कुणाची पाठराखण — पण ज्याच्या मनात खेळासाठी "काहीही" करण्याची मानसिकता होती, तो आज स्कूल गेम्स फेडरेशन ऑफ इंडिया म्हणजेच (एसजीएफआयचा मुख्य कार्यकारी अधिकारी बनला आहे.
टिळकनगर गावातून सुरू झालेला प्रवास!
पार्थ दोशी यांचा जन्म कोपरगाव तालुक्यातील टिळकनगर गावात झाला.आई मुख्याध्यापिका आणि वडील इंजिनिअर — साधं, मध्यमवर्गीय कुटुंब. शाळेपासूनच बॅडमिंटन, टेबल टेनिस, व्हॉलीबॉल अशा विविध खेळांमध्ये त्यांचा ओढा होता.बालवयातच त्यांनी मैदानावर स्वप्न बघायला सुरुवात केली.
"माझं स्वप्न थांबवू शकत नाही!"
खेळासाठी मैदान नसेल, तर ते तयार करायचं; साहित्य नसेल, तर स्वतःच्या खिशातून विकत घ्यायचं — ही पार्थची जिद्द होती. कोणतीही सुविधा नसतानाही त्याने कधी तक्रार केली नाही. त्याचं एकच तत्व होतं — खेळासाठी काहीही!
शिक्षण आणि अनुभव — दोन्ही हातात हात घालून!
खेळात उत्कर्ष मिळवतानाच पार्थने क्रीडा व्यवस्थापनाचं शास्त्रशुद्ध शिक्षण घेतलं. देशविदेशात विविध स्तरांवर अनुभव घेत, त्यांनी स्वतःला तयार केलं. कोणत्याही शिफारशीचा आधार न घेता, फक्त प्रामाणिक कष्टाच्या जोरावर ते पुढे सरकत गेले.
महाराष्ट्र व्हॉलीबॉल संघटनेचे सर्वात तरुण अध्यक्ष!
पार्थ दोशी हे महाराष्ट्र व्हॉलीबॉल संघटनेचे अध्यक्षपद भूषवणारे सर्वात तरुण व्यक्ती ठरले. त्यांच्या नेतृत्वात संघटनेत नवा जोश आणि पारदर्शकता आली. ग्रामीण खेळाडूंना संधी, चांगल्या सुविधा आणि खुली निवड प्रक्रिया — यामुळे महाराष्ट्र व्हॉलीबॉल संघटनेला नवसंजीवनी मिळाली.
नगर जिल्ह्यात तीन राष्ट्रीय स्पर्धांचे आयोजन — एक क्रांतिकारी पाऊल!
पार्थ यांच्या पुढाकारामुळे नगर जिल्ह्यात तब्बल तीन राष्ट्रीय व्हॉलीबॉल स्पर्धा पार पडल्या. यामुळे जिल्ह्यातील तरुणांना राष्ट्रीय खेळाडूंशी संपर्क साधण्याची संधी मिळाली, स्थानिक पातळीवरील पायाभूत सुविधा वाढल्या आणि जिल्ह्याचं नाव देशभर झळकू लागलं.
एसजीएफआय चा मुख्य कार्यकारी अधिकारी— स्वप्नपूर्ती आणि जबाबदारी!
शालेय क्रीडा क्षेत्रात अत्यंत महत्त्वाची संस्था असलेल्या स्कूल गेम्स फेडरेशन ऑफ इंडियाच्या मुख्य कार्यकारी अधिकारी पदावर पार्थ यांची निवड झाली. देशभरातील लाखो विद्यार्थ्यांसाठी ही संस्था राष्ट्रीय व आंतरराष्ट्रीय स्पर्धांचे आयोजन करते. पार्थ यांच्या नियुक्तीमुळे व्यवस्थापनात पारदर्शकता, गुणवत्ता आणि खेळाडू केंद्रित दृष्टिकोन येण्याची अपेक्षा वाढली.
नव्या योजना आणि दूरदृष्टी
मुख्य कार्यकारी अधिकारी म्हणून पार्थने ग्रामीण भागात अधिक स्पर्धा, गुणवत्ता-आधारित निवड प्रक्रिया, शिष्यवृत्ती योजना आणि पारदर्शकता यावर विशेष भर दिला. खेळाडूंना केंद्रस्थानी ठेवून काम करणं, ही त्यांची खरी ओळख ठरली आहे.
भारताचं आंतरराष्ट्रीय प्रतिनिधित्व — आय एस एफ जनरल असेंब्ली,सर्बिया!
८ एप्रिल २०२५ रोजी पार्थ दोशी यांनी झ्लातिबोर, सर्बिया येथे पार पडलेल्या इंटरनॅशनल स्कूल स्फोर्ट फेडरेशन ( आय एस एफ) च्या जनरल असेंब्लीमध्ये भारताचं प्रतिनिधित्व केलं. विविध देशांतील प्रतिनिधींसोबत संवाद साधत त्यांनी भारतातील क्रीडा क्षेत्रातील बदल, योजना आणि दृष्टीकोन मांडला.
त्यांनी आय एस एफ अध्यक्ष श्री. झेल्ज्को टॅनास्कोविच यांच्या सत्कार समारंभात देखील सहभाग घेतला. हा अनुभव भारताच्या शालेय क्रीडा विकासात मोलाची भर घालणारा ठरला.
पार्थ दोशी यांचा संदेश:
माझं स्वप्न मोठं होतं, आणि माझं ध्येय स्पष्ट होतं — मग साधनं असोत की नसोत, मी मागे हटलो नाही.
पार्थ दोशी यांची वाटचाल ही केवळ त्यांच्या व्यक्तिगत यशाची कहाणी नाही, तर ती संघर्षातून घडलेल्या यशस्वी नेतृत्वाची प्रेरणादायक गाथा आहे. त्यांनी हे सिद्ध केलं की नुसती इच्छा नाही, तर जिद्द, प्रामाणिकपणा आणि स्पष्ट दृष्टिकोन असेल, तर कुठलाही टप्पा दूर नाही.
