नाशिक दिनकर गायकवाड नांदगाव तालुक्यातील प्रिंपी हवेली येथील ऊसतोड मुकादम वाल्मीक बन्सी राठोड यांची चार लाख रुपयांची रोकड दुचाकीच्या डिक्कीतून चोरट्याने लंपास केल्याची खळबळजनक घटना घडली आहे.
ही घटना नांदगावच्या येस बँकेतून पैसे काढून न्यायडोंगरी येथे डॉक्टरकडे उधारी देण्यासाठी राठोड गेले असता घडली असून, सीसीटीव्ही फुटेजमध्ये चोरी करताना चोरटा कैद झाला आहे.
याबाबत पोलिसांनी दिलेली माहिती अशी, की वाल्मीक राठोड हे ऊसतोड मुकादम असून, कामासाठी मजुरांना पैसे देण्यासाठी त्यांनी सकाळी १० वाजता नांदगाव येथील येस बँकेतून चेकच्या माध्यमातून चार लाख रुपये काढले. त्यांनी ही रोकड उपरण्यात बांधून एका पांढऱ्या कापडी पिशवीत ठेवून ती एमएच ४१ बीटी ७७१२ या
क्रमांकाच्या प्लेटिना मोटारसायकलीच्या डिक्कीत ठेवली. डिक्की व्यवस्थित बंद करून त्यांनी न्यायडोंगरीच्या दिशेने प्रस्थान केले. सकाळी ११.३० वाजता राठोड हे न्यायडोंगरी येथील श्री शैनेश्वर क्लिनिकमध्ये डॉ. योगेश राठोड यांना उधारी देण्यासाठी गेले असता, काही मिनिटांनंतर परत आल्यावर गाडीची डिक्की उघडी दिसली.त्यात ठेवलेली चार लाख रुपयांची रोख रक्कम असलेली पिशवी गायब होती.डॉ.योगेश राठोड यांच्या क्लिनिकजवळ लावलेल्या सीसीटीव्हीमध्ये तपासणी केली असता, एक अनोळखी व्यक्ती मोटार सायकल जवळ येऊन डिक्की उघडताना व त्यातून पिशवी काढून घेऊन जाताना स्पष्टपणे दिसून आली. यानंतर ही माहिती पोलिसांना देण्यात आली. या चोरीप्रकरणी अज्ञात व्यक्तीविरुद्ध नांदगाव पोलीस ठाण्यात गुन्हा दाखल करण्यात आला आहे.
