नाशिक दिनकर गायकवाड मालेगाव येथील एका किराणा दुकानात अवैधरीत्या विक्री होणारा नऊ किलो गांजा स्थानिक गुन्हे शाखेच्या पथकाने मालेगावमध्ये जप्त केला आहे.
मालेगाव तालुक्यातील सौंदाणे गावाच्या शिवारात एका किराणा दुकानामध्ये अवैधरीत्या गांजाची विक्री होत असल्याची गोपनीय माहिती स्थानिक गुन्हे शाखेचे पोलीस निरीक्षक रवींद्र मगर यांना मिळाली होती.त्यानुसार त्यांच्या पथकाने अंमली पदार्थविरोधी श्वान पथकासह सौंदाणे गावातील श्रीगणेशा किराणा दुकानावर
छापा टाकला.त्यावेळी नीलेश बापू पवार (वय ३०, रा. सौंदाणे) हा अवैधरीत्या गांजाची विक्री करीत असल्याचे आढळून आल्याने पोलिसांनी त्याला ताब्यात घेतले. त्याच्या ताब्यातून १ लाख ७८ हजार ४०० रुपये किमतीचा ८ किलो ९२० ग्रॅम गांजा, १० हजार रुपये रोख, मोबाईल, गांजा ओढण्यासाठी लागणाऱ्या ५० चिलिम असा एकूण २ लाख ७०० रुपयांचा मुद्देमाल जप्त केला.
नीलेश पवार याच्या विरुद्ध मालेगाव पोलीस ठाण्यात गुन्हा दाखल करण्यात आला आहे. अधिक तपास पोलीस करीत आहेत.
